Act 6 | MED | STEP | Ui mat omba puⱡnga, Jisas nga kitip kᵾni wamp rukᵾr orung ei nga, ou nduⱡnga, ik mbun mat oⱡa urum. Ei nga, Jura wamp Grik ik tetmin kᵾⱡ ndi, Jura wamp mendpᵾⱡ kᵾⱡ kundᵾk, en enim nga amp wiya mbᵾ, rᵾng na mel mbᵾ nga tᵾk rapᵾndᵾk, ngui ngangᵾnmᵾn, nᵾtᵾng.

Acts 6

Tᵾpa Rᵾpᵾndi Wu 7 Kᵾⱡ To Rorung

1 Ui mat omba puⱡnga, Jisas nga kitip kᵾni wamp rukᵾr orung ei nga, ou nduⱡnga, ik mbun mat oⱡa urum. Ei nga, Jura wamp Grik ik tetmin kᵾⱡ ndi, Jura wamp mendpᵾⱡ kᵾⱡ kundᵾk, en enim nga amp wiya mbᵾ, rᵾng na mel mbᵾ nga tᵾk rapᵾndᵾk, ngui ngangᵾnmᵾn, nᵾtᵾng. 2 Ei mel nilingina, Jisas nga nombuⱡa rung wu 12 ni kᵾⱡ ndi, kitip kᵾni wamp mat kundᵾk, nᵾk mel, “Tᵾn Got nga ik mbo indimin uⱡ ei, wak ropᵾn, kᵾng orunga mbun ei nga nimin ndam, kapⱡa iti natᵾmba. 3 Ei nga angmᵾn! Enim ndi, wamp mbᵾ kᵾn, molk kai mundangina, enim nga ruk ting ila wu 7 kat, Muⱡnga Wingti ndi, ronduⱡ nguⱡnga, pilpa kungᵾndi kai tek mormin wu kat, to rop mundamina, wu kᵾⱡ ndi, uⱡ mbun penim ei, rᵾp etᵾk muⱡeing. 4 Wote, tᵾn rᵾk rᵾk atinga ropᵾn, wamp mbᵾ, Got nga ik ei, mbo rundᵾmin,” nᵾtᵾng.

5 Wote, wamp nimbᵾ pora, Jisas nga kitip kᵾni wu ni kᵾⱡ nga ik ei, pilik numan ndi kolk, wu mat mbi rok tᵾtᵾng. Wu kᵾⱡ nga ti, Stipen ni, wu ei Nuim ei mondpa pitim. Wote, Muⱡnga Wingti ndi, peka rurum wu ei kᵾn, Pilip, Prokoras, Nikanor, Timon kᵾn, Parminas, wote Antiyok kona ila wu Nikolas omba, Jura wamp nga wu, Got ei, mondpa pitim wu ei kᵾn, kandᵾk tᵾtᵾng. 6 Wamp mbᵾ ndi, wu kᵾⱡ tᵾk, Jisas nga kitip kᵾni wu kᵾⱡ kᵾn, ngᵾk ruk nduⱡina, wote kitip kᵾni wu ni kᵾⱡ ndi, peng ambulk atinga rondrung.

7 I elingina, Got nga ik ei, tepa ekit puⱡnga, Jerusalem kona ila wamp ou ndupa ok, kitip kᵾni wamp rarᵾng. Wote, wu pris ou ndupa ku, Got nga ik ei pilik tᵾk, wote Got kᵾn mondᵾk pilik wamp mbᵾ kᵾn ok, tᵾk tenda etᵾng.

Stipen Ni, Tᵾk Imp Morung

8 Got ndi, wu Stipen, memp pendilinga, ronduⱡ tᵾpa moⱡpa, uⱡ rᵾpndi ou ndupa mat wengᵾndpa, wamp morung kona nimbila itim. 9 Wote wu mat, Stipen kᵾn, ik ou ndupa nᵾtᵾng. Wu mbᵾ nga wu mat, Sairin kona kᵾn, Aliksendriya raⱡ nga atinga manga ila ei, mbi tek wamp wei mormᵾn mbᵾ imp muⱡi nambᵾrmun wamp mbᵾ nga atinga manga nᵾtmin. Wote, wamp mat, Eisiya kᵾn, Silisiya kona raⱡ ila ok molk, Stipen kᵾn ik ou ndupa nᵾtᵾng. 10 Wote, Got nga Muⱡnga Wingti ei ndi, Stipen ni, pilpa kungᵾndi kai mbᵾ nguⱡnga, Stipen nga ik ei, wamp mbᵾ ndi, kapⱡa rok mana ndui nᵾndrᵾng. 11 I elinga, wu mat ndi, mat kunt rok, ik mat nᵾk amundᵾk, ya ei mel kᵾndᵾk nᵾk mel, “Tᵾn pilmin ei, Stipen ndi, Got kᵾn Moses raⱡ nga ik, raka rondpa ninim nᵾi!” nᵾtᵾng. 12 Ei mel nilingina, wamp mbᵾ kᵾn, rᵾp wu mbᵾ kᵾn, wote mi ik mbo wu mbᵾ nga numan orunga, etᵾp popᵾⱡ oⱡa tᵾndᵾtᵾng. Wu mbᵾ kᵾn, ik rondᵾk mundᵾk, nᵾk mel, Stipen imp molk mek puk, manga wingti ila rup wu nuim mbᵾ, morung nila purung. 13 Wote, aldpa wu mat kunt rok, ik kol rok ei mel, kᵾndᵾk nᵾk mel, “Ya wu ei, rᵾk rᵾk tᵾn nga manga wingti ei kᵾn, Moses nga mi ik ngurum kᵾⱡ kᵾn, nimba kit mondrum. 14 Wote, wu ei ndi, ik ti nitim ei, ‘Nasaret wu Jisas ndi, tᵾn nga manga wingti ei, ropa ᵾtkil ropa, wote Moses ndi, wamp molk kunding ei mel, man ngurum uⱡ mbᵾ tᵾpa ekit ndumba,” nᵾtᵾng. 15 Manga wingti ila rup wu nuim morung nimbᵾ ndi, ronduⱡ mundᵾk, Stipen nem nem kandrung mel, Stipen nga kuimp keta ei, Got nga anggelo mbᵾ nga kuimp keta ei mel titim.